Eis Schüler vun der 2C-URBS haten de grousse Privileeg, mat engem Mataarbechter vu MeteoLux en Tour an der Camionnette iwwer de „ganzen“ Terrain vum Findel ze maachen. Si krute verschidde Geräter fir Klimadaten z’ erfaasse gewisen an hunn e. a. geléiert, firwat Plastiksbullen iwwer de Wasseropfangbecken leien (fir datt d’Vullen net ugezu ginn) an datt d’„Fligerbréck“, déi iwwer d’Autobunn féiert, net direkt vu Fligere genotzt gëtt, mee am Fluchverkéier eng wichteg Roll spillt. Si haten esouguer d’Chance, en Datenzenter vu bannen ze gesinn a bis erop an den Tower ze goen. E grousse Merci dofir un dat ganzt MeteoLux-Team!