Den 13.5. war d’1C-URBS d’Entreprise WEO (www.weo-water.com) an der Stad besichen. D’Schüler kruten en detailléierten Abléck an d’Approche vu WEO, an esou och eng liewensno an aktuell Applikatioun vu Geoinformatiounssystemer: D’Kärgeschäft vu WEO besteet nämlech dodran, ëffentlech verfügbar Satellitten-Date mat Hëllef vu « Machine Learning » zu accessibele Kaarten ze verschaffen. Dës Kaarten illustréieren, wat fir Impakter de Klimawandel z. B. op den Territoire vun enger Gemeng huet: Wou staut sech am Summer d’Hëtzt? Wou gëtt et en Héichwaasserrisiko bei Starkreen? Sou kann dës Gemeng cibléiert Mesuren ëmsetzen, fir sech un de Klimawandel unzepassen.