Den 12. Oktober sinn 2e- an 3e-Schüler aus der Optioun « Life Science » op d’Schlammwiss gefuer, fir do dat gréisste Schilfgebitt vum Land z’entdecken. Se kruten d’Beréngungsstatioun gewisen an Techniken, fir d’Villercher ze fänken a se direkt dono nees ze befreien. Et war fir jiddereen en eemolegt Erliefnis, sou vill verschidden a rar Villerchersaarten sou no kënnen ze gesinn. Souguer en Äisvugel war dobäi! Et goufen och e puer amerikanesch Flosskriibsen aus der Syr gefaangen an d’Thema « Neobioten » gouf dunn thematiséiert. Dono sinn d’Schüler nach d’Wasserbüffele kucke gaangen, déi säit engem Joer an dem Naturschutzgebitt op der Schlammwiss-Brill weeden. En décke Merci un den Här Eric Kraus vun der Fondatioun « Hëllef fir d’Natur » fir déi ausféierlech Erklärungen um Terrain.