No laanger Zäit war et lescht Woch endlech nees esouwäit! Dat drëtt Treffen vum “Erasmus+”-Projet konnt stattfannen! Fënnef 2e-Schüler aus dem LJBM waren zesumme mat hire Professeren vum 14. bis den 20. November zu Skara a Schweden ënnerwee, wou si mat Delegatiounen aus Spuenien, Däitschland, der Belsch a Schweden eng ganz intensiv, flott an interessant Woch verbruecht hunn. Ënnert dem Motto „Face the past – Change our future“ hu si sech an der Katedralskolan zu Skara ënnert anerem mat der Geschicht vum Sámi-Vollek an der Entwécklung an der Duerstellung vun der schwedescher Geschicht an diverse Muséeë beschäftegt. Wuelverstanen stoungen nieft der intensiver Aarbecht och verschidden Fräizäitaktivitéiten, wéi e Besuch vun der Haaptstad Stockholm, e Rendez-vous mat den Elchen oder e flotten Tour op der Schlittschongpist um Programm.